Përse duhet ta lexojnë të krishterët Testamentin e Vjetër?
Testamenti i Ri flet për Jezusin dhe çfarë Ai ka bërë, dhe kemi mësuar se kjo është gjithçka që nevojitet për shpëtimin. Atëherë, përse duhet ta lexojnë të krishterët Testamentin e Vjetër, me ligjet e tij të vjetëruara dhe historitë e gjata që nuk duket se lidhen me Jezusin dhe mesazhin e Tij?
Epo, Jezusi vetë thotë:
“Mos mendoni se unë erdha për të shfuqizuar ligjin ose profetët; unë nuk erdha për t’i shfuqizuar, po për t’i plotësuar. Sepse në të vërtetë ju them: Deri sa qielli dhe toka, të kalojnë asnjë jotë a asnjë pikë e ligjit nuk do të kalojnë, para se të plotësohet gjithçka.” (Mateu 5:17-18).
“Ligji dhe Profetët” i referohen Testamentit të Vjetër. Jezusi po thekson se Testamenti i Vjetër është po aq i rëndësishëm edhe sot. Pyetja është, në çfarë mënyre?
Përmbushja përmes Jezusit
Në Testamentin e Vjetër, populli i Perëndisë u udhëzua të bënte shumë gjëra që na duken të çuditshme sot: të shkonin në tempull, të bënin flijime për mëkatin, të mbeteshin të pastër duke shmangur disa ushqime, dhe kështu me rradhë. Aspekte të tjera të Testamentit të Vjetër janë më të njohura: njerëzimi ra në mëkat përmes Adamit dhe ka nevojë për shpëtim, dhe njerëzit e Perëndisë duhet të jetojnë sipas vullnetit dhe urdhërimeve të Tij për të mos i bërë keq njëri-tjetrit.
Çfarë do të thotë, atëherë, kur Jezusi thotë se ai erdhi për t'i plotësuar të gjitha këto? Do të thotë se Ai sjell diçka që është e njëjtë, por më e madhe dhe më e përkryer.
Dhe pikërisht këtë bën Jezusi! Ligji i kërkonte Izraelit të bënin flijime kafshësh—Jezusi është flijimi përfundimtar që lan mëkatet e gjithë botës. Librat e Moisiut na tregojnë se vdekja hyri në botë—Jezusi sjell ringjalljen nga të vdekurit. Izraelitët duhet të mbanin urdhërimet e Perëndisë dhe t'i donin fqinjët e tyre—Jezusi e mishëroi këtë dashuri duke dhënë jetën e Tij për ne.
Jezusi, pra, e tejkalon Testamentin e Vjetër. Ai është më i madh. Por kjo nuk e bën Testamentin e Vjetër më pak të vlefshëm. Mund të thuhet se Jezusi është përgjigjja për të gjitha pyetjet që shtron Testamenti i Vjetër—por nëse nuk i kemi lexuar pyetjet, si mund ta kuptojmë përgjigjen?
Ekziston rreziku i keqinterpretimit të Testamentit të Ri nëse është e vetmja pjesë e Biblës që kemi lexuar. Për shembull, pa njohurinë për rënien në mëkat, mund ta shohim Jezusin thjesht si një mësues të mirë filozofik, dhe jo si Shpëtimtarin e dërguar nga Perëndia për të na shpëtuar nga mëkati dhe vdekja.
Testamenti i Vjetër si themeli
Autorët e Testamentit të Ri e kuptuan këtë. Ata kishin vetëm Testamentin e Vjetër dhe jetën dhe mësimet e Jezusit, por kjo ishte gjithçka që u nevojitej. Me ato, ata mund të kuptonin gjithçka.
Testamenti i Vjetër flet për Jezusin. Profeci pas profecie tregojnë për një Shpëtimtar që do të vinte, dhe Jezusi përputhet mrekullisht me këto profeci (shih Isaian 53 për vuajtjet e Jezusit ose Osean 6:1-2 për ringjalljen e Tij).
Testamenti i Vjetër është themeli i gjithçkaje që besojmë si të krishterë. Pa e lexuar atë, nuk do ta kuptonim se Perëndia krijoi botën, se njerëzimi ra në mëkat, apo planin e shpëtimit të Perëndisë nga Adami deri te Jezusi.
Por ne kemi si themelin ashtu edhe përgjigjen, të vjetrën dhe të renë. Sot, e kemi më të lehtë se kurrë për t'i lexuar të dyja në gjuhën tonë sa të duam—si mund të mos gëzohemi në hirin e Perëndisë?
Pyetje për Diskutim:
1. Si mendoni se do të kuptohej Bibla pa lexuar librat e Moisiut? Pa histori krijimi, pa rënie në mëkat, pa udhëtim në shkretëtirë...
2. Si mendoni se do të kuptohej Bibla nëse do të lexoheshin vetëm librat e Moisiut?
Ky artikull është shkruar nga Simon Jern, MTh. Ai jeton në Vaasa, Finlandë dhe punon për Shoqatën Ungjillore Luterane Suedeze në Finlandë (SLEAF). Ky artikull është botuar më parë në suedisht në “Ungitro” dhe mund të gjendet në https://www.ungitro.fi/varfor-ska-vi-lasa-gamla-testamentet/